“Gusto ko na iyong ganito. Ikaw at ako. Ayoko nang baguhin pa.”

Unang kita pa lang ni Erin sa guwapo at batang-batang businessman na si Nathaniel ay may espesyal na siyang nararamdaman para sa lalaki. Pero mayroon na itong girlfriend kaya malabong mapansin siya.
Kinasihan si Erin ng tadhana nang magpasya ang papa niya at ang lolo ni Nathaniel na ipakasal sila. Inaasahan na niyang tatanggi si Nathaniel. Pero laking pagtataka niya nang pumayag ito. Nakasilip siya ng pag-asa. Pero ang pag-asang iyon ay nauwi sa kalbaryo. Laging malamig ang pakikitungo ni Nathaniel sa kanya, para bang ayaw siyang makita.
Pero nagulat siya nang magbago ang pakikitungo ni Nathaniel sa kanya, at madalas na panakaw siyang tinitingnan. Ilang beses din na pasimple nitong hinahawakan ang kanyang kamay. Nang sitahin niya ito, ninakawan siya ng halik.
Nagkakahugis na sa harap ni Erin ang isang happily ever after sa piling ni Nathaniel nang muli na namang nakialam ang papa niya at lolo nito. Sa pagkakataong iyon ay may aaminin ang dalawa na magpapabago sa relasyon nila ni Nathaniel.