Nasa panganib ang buhay ni Audrey at kailangan niyang magpakalayo-layo para hindi matunton ng kaaway ng tinamaan ng magaling niyang boyfriend. Napadpad siya sa bahay ni Seth Alcazar, bokalista ng bandang Twilight. Idol at crush niya ang lalaki kaya nang malamang may pinagdadaanan ito ay handa siyang tumulong gamit ang kakaibang kakayahan.

Psychometry with clairsentience ang tawag sa kanyang kakayahan. May mga pagkakataon na kapag nahawakan niya ang isang bagay ay nasasagap niya ang emosyon, alaala at mga tagpong konektado roon. Ang gustong mangyari ni Seth ay subukan niyang pakiramdaman ang kantang kinompose ng girlfriend nitong si Millie bago mamatay ang babae.

Pumayag si Audrey Sa palagay kasi niya ay makakatulong iyon para maka-move on na si Seth mula sa malalim na depresyong bunga ng pagkamatay ng nobya. Kaya lang, mas marami pang natuklasan si Audrey bukod sa kanta. Ang nadiskubre niyang iyon ay may kakayahang magpalaya sa lalaki sa sobrang pagmamahal kay Millie. Pero puwede rin iyong maging daan para lalong magalit si Seth sa mundo... at sa kanya.