Si Nick ang tanging lalaking nagparamdam sa kanya kung paano mahalin, ang nagturo sa kanya kung paano magmahal.

Wala nang mahihiling pa si Alyssa Cabrera sa buhay. Maganda siya, may mapagmahal na mga magulang, at may matatag na career bilang isang sikat na ballerina. Ngunit nang makilala niya ang guwapong photographer na si Nick Salcedo, noon niya napagtanto na may kulang pa pala sa buhay niya at iyon ay ang pag-ibig ng isang lalaki.

Sinuyo siya ni Nick, ipinadama na mahal siya at espesyal. Siya naman ay hindi maipaliwanag ang kaligayahan kapag kasama si Nick. Kaya naman agad niyang tinanggap ang binata nang magtapat ito ng pag-ibig. Nakumpleto pa ang kanyang kaligayahan nang magpakasal sila.

Ngunit ang inaasahan ni Alyssa na masayang pagsasama nila bilang mag-asawa ay tila naging bangungot. Sa hindi malamang dahilan ay biglang nanlamig si Nick sa kanya. Tila hindi na ito ang lalaking kanyang inibig at pinakasalan. Ang mas malala pa, natuklasan niya na ang lahat pala ng ipinakita ni Nick sa kanya mula umpisa ay isa lamang pagkukunwari, isang panlilinlang!