“Stop stalking Blue. And stop taking pictures of him.”
Hindi nagustuhan ni Cazy ang mariing utos ni Cyrus. Inuutusan lang naman siya ng lalaki na itigil ang dalawang bagay na gusto niyang ginagawa: ang kumuha ng mga litrato at subaybayan ang crush niyang si Blue. “Huwag mong sabihin na… na may gusto ka sa akin? Iyon ba ang dahilan kaya mo ako pinipigilan sa pag-i-stalk kay Blue?” Hindi nakasagot si Cyrus. “Oh, God! Nilapitan mo ako para patigilin sa ginagawa ko dahil may gusto ka sa akin. Nagseselos ka sa kaibigan mo.”
“Ayokong masaktan ka lang sa bandang huli,” sagot ni Cyrus. “Because my friend is in love with another woman.”
Pero paano ipapaliwanag ni Cyrus ang espesyal na atensiyon na ibinibigay nito sa kanya kapag magkasama sila? Sinasamahan siyang mag-lunch at mag-research sa library kahit natutulog lang ito roon. Nag-effort pa si Cyrus na bigyan siya ng ticket sa isang photo exhibit at ipakilala sa idol niyang photographer dahil alam nitong iyon ang makakapagpasaya sa kanya.
Posible ngang may gusto sa kanya ang tinaguriang campus heartthrob. In denial lang. Eh, si Cazy, bakit naman kinilig sa ideyang iyon? Hindi kaya, in denial din?