“Staying away from you was the hardest thing I’ve ever done in my life. Pagsama-samahin man lahat ng hirap na dinanas ko sa buhay, mani `yon kung ikukumpara sa dusang tiniis ko habang napipilitan akong lumayo sa `yo…”

Matindi mang mangarap si Halley ay hindi pa rin niya inakala na darating ang panahong makakaharap niya nang personal ang isang lalaking kagaya ni Jarred Romero. Hindi lang ito isang sikat na personalidad, nag-uumapaw din ang binata sa lahat ng katangiang hinahanap ng isang babae sa lalaking ihaharap sa altar.
Hindi lang niya nakaharap si Jarred. Hiningan pa siya nito ng pabor. At naging daan ang pabor na iyon para lalo silang magkakilala, magkalapit, at ang malaking himala ng langit, ang tila pagkakaroon ng kakaibang pagtatangi para sa kanya ng lalaki.
Iyon nga lang, bukod sa medyo imposibleng maging sila, mulat din si Halley sa katotohanang hinding-hindi sila bagay ng lalaki. Masyadong perpekto si Jarred para sa isang katulad niya.
Kung kailan nga lang nahimok na siyang mangarap ay saka niya napatunayan na tama ang unang opinyon niya. Malabong magkagusto sa kanya si Jarred, lalo na at ang mga tao sa paligid nila ay harap-harapang ipinapakita na tutol ang mga ito sa kanilang dalawa.