Tanggap na ni Monica na kahit kailan ay hindi na babalik si Totoy sa bayan nila. Kung anumang ugnayan mayroon sila noon ay hindi na madurugtungan pa iyon.
kaya naman.ganoon na lamang ang pagkagulat niya at ng iba pang tagaroon sa pagsulpot nito sa libing ng ama nitong si Mang Larding.
Iyon ang dahilan—at marahil ang pananabik ding makita nito ang mga kapatid nito—ang nagtulak dito para magbalik. Pero duda siya kung kasama siya sa mga dahilang iyon. Wala naman kasi silang pormal na relasyon noon. Yes, they had been lovers ngunit iyon lang naman ang naging relasyon nila. Hindi naman siya niligawan nito. Ang nangyari sa kanila ay bunsod lamang marahil ng kalikasan.
Sa parte marahil nito ay ganoon. Ngunit sa parte niya, ibinigay niya ang kanyang sarili rito dahil mahal niya ito at hindi dahil sa kung ano pa man.
Ayaw na niyang paasahin ang kanyang sarili. Pero bakit sa lahat naman ng puwedeng malapitan ay sa kanya pa ito lumapit? Senyal ba iyon na kasama siya sa mga binalikan nito?