Galit si Sunday sa mga lalaki dahil sa pag-aabandona sa kanilang mag-ina ng kanyang ama. Kaya nang lokohin ng nobyo nito ang pinsan niyang si Candice ay siya na ang gumanti para dito. Nang makita niya sa isang restaurant ang nobyo ni Candice ay ibinuhos niya ang isang basong tubig sa ulo nito. Laking pagkapahiya ng lalaki sa mga nakasaksi ng eksenang iyon—para lamang matuklasan ni Sunday sa kalaunan na maling lalaki pala ang nagantihan niya. Dahil kakambal pala iyon ng lalaking nanloko sa pinsan niya!
Doon nagsimula ang kabanata nila ni Andro Miguel Villonco, ang kakambal ng nobyo ni Candice. Laking gulat niya nang malaman niyang si Andro pala ang pinakabagong bigating kliyente ng kanyang negosyo! Kaya nagkaroon ito ng pagkakataong insultuhin siya mula ulo hanggang paa. Ngunit nagbago ang ihip ng hangin nang basta na lamang ipakilala siya nito bilang fiancée nito nang bumalik ang dating nobya nito.
Iyon na ang pagkakataong nakita niya upang makaganti rito.