Kahit sino pang babae ang maghubad sa harap ko, titingnan ko lang sila pero ikaw pa rin ang yayakapin ko.

Halos sagad sa buto ang galit ni Blessy sa kababata at kinakapatid na si Gray. Ito kasi ang unang lalaking nanakit sa bata niyang puso. Inakala niyang totoo ang naging pagsinta nito pero ginawa lang pala siyang panakip-butas. Kaya sumumpa siya na hindi na niya ito kakausapin o paniniwalaan kahit kailan. Kahit na magunaw pa ang mundo.
Sampung taon ang nakalipas, isang trahedya ang nagpabago sa pusong-bato ni Blessy para kay Gray. Nang maaksidente ang binata ay humingi ito ng kapatawaran na mabilis naman niyang ibinigay. True to his promise, bumawi naman si Gray sa kanya. Ipinakita ng binata kung gaano ito nagsisi sa mga ginawa sa kanya noon.
Ang hindi inaasahan ni Blessy ay unti-unti na namang nabubuhay ang damdamin niya para kay Gray. Pero paano kung matuklasan niya na sa ikalawang pagkakataon ay niloloko lang pala uli siya nito?