“`Wag kang masyadong sweet at baka naman pati ako, ma-in love sa `yo. Mas malaki ang problema mo `pag nagkataon… Maligalig ako `pag in love.”

Mukhang pera, lahat ng raket, kakarerin. Iyon ang lifestyle ni Sam. Kaya nang kunin ni Atty. Bartolome “Tulume” Madlangbayan ang serbisyo niya sa halagang three hundred pesos per hour, kinagat agad iyon ni Sam.
Madali lang naman ang trabaho: girlfriend siya kunwari ng lalaki para maitaboy ang dalawang “manang” na obsessed sa alindog ng biyudong abogado.
Pero raketera man, mahina ang “processor” ni Sam. Hindi niya naisip na naisahan siya ng guwapong abogado. Ang naisip lang niya ay ang 300 pesos times many times. Hindi niya naisip na wala pala siyang imu-multiply kapag hindi niya kasama ang lalaki.
Para makarami ng “times,” dapat lagi silang together.
Three hundred times twenty-four—iyon ang goal ni Sam para maka-quota ng pambayad sa bills. Pero paano kung laging busy ang attorney?
Di abalahin. Yayaing mag-date.