“Ngiti mo pa lang, motivation na.”

Kilala si Mira bilang mabait at matulunging babae. Nang mangailangan ng tulong ang isa sa mga estudyante ni Mira, pinagbigyan niya ito. Siya kasi ang papalit sa ina ng estudyante bilang sekretarya ng isang misteryosong writer na nasa isang liblib na isla—si Rhett. Sa pagpayag niya, makakauwi na ang ina ng bata na matagal na nitong hindi nakakasama.
Pero hindi lang misteryoso ang magiging amo ni Mira, istrikto din ito. Maraming ipinagbawal si Rhett sa kanya na naging dahilan kung bakit ni hindi niya makausap ang kanyang pamilya.
Hanggang sa isang araw ay bigla-bigla na lang bumait ang “Grouch” na writer. Inilabas siya nito, sinunod ang mga gusto niya at naging maluwag din sa kanya. Ibinigay nito ang mga gusto niya at tila napasobra naman iyon. Pati kasi pag-ibig nito ay inalok na rin sa kanya.
Tinanggap ni Mira ang pag-ibig ni Rhett dahil mahal na rin niya ang lalaki, sa kabila ng mga nabatid niyang kakaiba sa pagkatao nito. Pero ano’ng nangyari at isang araw ay bigla itong nagpaalam at sinabing pinalalaya na siya?