“Gusto mo bang gisingin kita ng halik para malaman mo na hindi ka nananaginip?”

Christmas Killer. Iyan ang role ni Ashley pagtapak niya sa Pilipinas. Kailangan niyang ilayo ang kanyang ama sa boyfriend nito na walang ginawa kundi gawin itong personal Santa Claus. Kakaladkarin niya ang ama pabalik sa Amerika para makabalik na siya sa trabaho. Pasko? Hindi iyon uso sa kanya. Lilipas din iyon gaya ng mga nagdaang taon.
Pero sa halip na ang happy couple ang maabutan ni Ashley sa condo unit ng kanyang ama, ang nandoon ay si Robinson—ang hubadero, nanlilimahid pero guwapo at makisig na pintor na bantay ng condo unit.
Ayaw ni Ashley sa guwapo. Ayaw niya sa dugyot na pintor. At ayaw niya na dini-distract siya ng binata sa paggiling nito sa kantang “Careless Whisper” habang nakasuot ng Santa’s hat para aliwin siya. Kaya nilayasan niya ito. Pero sa kamalas-malasan ay nanakawan siya ng riding in tandem, tangay ang laptop niya, cell phone, credit cards, at pati travel documents. She was stuck in this God-forsaken country with nothing.
Wala siyang matatakbuhan kundi ang dugyot na pintor na si Robinson. At habang kasama niya ito, hindi niya inasahan na kaya pala nitong ipadama sa kanya ang tunay na diwa ng Pasko. Love, love, love…