Walang pinipiling panahon ang pag-ibig. Kahit na anong oras o sitwasyon, puwede kang magmahal. Kahit wasak ang puso mo.


Hindi kita gusto para sa kapatid ko…
Ilang beses na iyong nasabi ni Dusk kay Chantal. Sa tuwing magkikita sila, wala siyang bukambibig kundi ang disgusto niya sa babae. Kaya ganoon na lang ang inis ni Chantal sa kanya.
Lalo lang nadagdagan ang pagkaasar ng babae sa kanya nang birahan niya ito ng: ‘I told you, Chantal. You’re not meant to be with my brother’ nang mag-break ang dalawa.
Pero ang totoo, unang kita pa lang ni Dusk kay Chantal, minahal na niya ang babae. Pero ang kapatid niyang si Drake ang minahal nito. Kaya nagparaya siya alang-alang sa kaligayahan ng dalawang taong parehong mahalaga sa kanya. Nagpakalayo-layo siya para makalimot.
Pagkalipas ng ilang taon, he came back hoping that Chantal would finally love him back. Gumawa siya ng paraan para mapalapit sa babae kahit na nga ba mayabang at antipatiko ang tingin nito sa kanya.
Isang paraan lang ang naiisip ni Dusk para mabigyan siya ng pagkakataon na mapaibig si Chantal—ang pagpanggapin itong fiancée niya para mapigilan daw ang kasal ni Drake.
Bawal ang sukob, di ba?
Pero may iba siyang plano—he would do everything to make his fiancée fall in love with him…