Hindi ako nakadama ng lungkot dahil lagi kang nandiyan para pasayahin ako. Pero nang mawala ka sa akin, ni hindi ko magawang ngumiti man lang.
Pagkatapos iwan si Carlie sa altar ng lalaking pakakasalan niya ay nawalan na siya ng sampalataya sa pag-ibig. Pati ang trabaho niya bilang romance novelist ay nalagay rin sa alanganin. Umaasa siyang maibabangon niya ang sarili sa pagdalo sa fans day kung saan mararamdaman niya ang pagmamahal sa kanya ng mga reader niya.
Pero sa halip na siya ang dumugin ng fans niya, ang guwapong host na si Juan Felipe Krisologo III, o JFK, ang pinagkaguluhan ng mga ito. Panibagong sampal na naman iyon sa kanya. Nakaramdam din siya ng pagkainis sa lalaki.
Pero lumambot ang puso niya para kay JFK nang magkita uli sila sa isang resort at masaksihan niya kung paano nawasak ang puso nito dahil sa isang babae. Ipinangako niya sa kanyang sarili na papawiin niya ang lungkot nito para hindi nito maranasang maging miserableng tulad niya. If she helped him, it would be like fixing her broken heart as well.
Ngunit hindi napaghandaan ni Carlie na mahuhulog ang loob niya kay JFK.
Handa na kaya si JFK na magpapasok uli ng bagong pag-ibig sa puso nito?