Kung tatanungin mo ako kung bakit kita nagustuhan, malamang na abutin ako ng buong araw para isa-isahin ang lahat ng magagandang dahilan.

Mula pagkabata ay matalik nang magkaibigan sina Kasch at Kiefer. Nasanay na si Kasch na ang binata ang kasama niya at pinagsasabihan ng mga sekreto. Pero may isang sekreto siya na kahit ano ang mangyari ay hindi niya magagawang ipagtapat. Mga paslit pa lamang sila ay mahal na niya si Kiefer. Nagising na lamang siya isang umaga na tila matutunaw na siya sa mga ngiti nito.
Kaya nang mabasa ni Kasch ang sulat kung saan aksidenteng nalaman niya na may katugon ang nararamdaman niya ay ganoon na lamang ang kanyang katuwaan. Nagkaroon siya ng tapang na magtapat sa binata.
Pero napahiya siya nang malamang hindi siya ang babaeng tinutukoy ni Kiefer sa sulat.
Dahil sa pagkapahiya ay umiwas na si Kasch at hindi na nagpakita pa sa binata.
Ngunit hindi sinasadyang muling nagtagpo ang kanilang mga landas. Sa pagkakataong ito, magagawa ba uling iwasan ni Kasch si Kiefer o tatanggapin niya ang pakikipagkaibigan na muling inaalok ng binata?