Nakaaway ni Charm ang ate niya. Mas pinili nitong paniwalaan ang swanget na boyfriend nito kaysa sa kanya kaya nag-alsa-balutan siya. Eksakto namang nasa honeymoon ang kaibigan niyang si Naomi at iniwan nito ang susi ng bahay nito sa kanya. Nag-e-mail siya rito na makikitira siya habang hindi humihingi ng pasensiya ang ate niya.

Nagulat siya nang pagdating niya sa bahay ay madatnan niya roon si Zeke, ang kaibigan ng asawa ni Naomi. Ayon dito, doon daw muna nakikituloy ito dahil naiingayan ito sa kapitbahay nitong nagpapagawa ng bahay.

From then on, naging housemates na sila. Komportable siya rito dahil ang alam niya ay bakla ito—ayon na rin dito. Pero nagsimula siyang magduda nang halikan siya nito. Malayong maging bakla ito kung pagbabasehan niya ang halik nito.

Isang pasya ang nabuo niya: Aakitin niya ito. Sayang naman kasi ang lahi nito...