Hirap makahanap ng trabaho si April. Gayunman, trabaho na mismo ang humanap sa kanya—isang hindi pangkaraniwang trabaho. Isang lalaking nagngangalang “Russel” ang lumapit sa kanya at inalok siya ng trabahong magpapabago sa kanyang buhay. Ayon kay Russel, kamukhang-kamukha niya ang kapatid nitong si Nessa na namatay sa isang vehicular accident. Hindi raw alam ng pinakamamahal nitong lola—na nagka-amnesia dahil din sa nasabing aksidente—na patay na si Nessa. Kaya kailangan siya ni Russel na magpanggap bilang kapatid nito.
Madali lang ang trabaho kaya pumayag si April. Ang hindi madali ay ang iwasang mahulog ang kanyang loob sa guwapong lalaki na gumaganap na kuya niya. Mabuti na lang at may pagtingin din sa kanya si Russel.
Mukhang wala namang hadlang sa magandang pagtitinginan nina April at Russel. Hanggang isang sekreto ang nabunyag, isang multo ng kahapon, na sisira sa lahat…