“Madalas akong nagkakasala sa`yo. Kapag niyayakap kita, wala kang kamalay-malay pero tsansing na yata iyon…”    Halos sabay na lumaki sina Rhonwyn at Doroy dahil na rin sa kanilang mga ama na matalik na magkaibigan. Kaya naging malapit din sila sa isa’t isa. Tulad ng kanilang mga ama, dedikado sila sa trabaho bilang mga alagad ng batas. Kaya wala silang panahon na pagtuunan ang love life.  Kaya nang malaman nilang pareho pala silang kinukulit ng kani-kanilang ina na mag-asawa na, bigla na lang sinabi ni Doroy na silang dalawa na lang daw ang magpakasal. Tutal matagal na rin silang magkakilala at tiyak daw na ikatutuwa iyon ng namayapa na nilang mga ama.  May hatid na tuwa ang bagay na iyon kay Rhonwyn, lalo at noon pa man ay inaalagaan na niya sa kanyang puso ang lihim na damdamin para kay Doroy. Kung sana ay may ganoon ding damdamin para sa kanya ang binata...