Dream come true para kay Yomi na makita sa personal ang idolo niyang si Gray Sandejas. Miyembro ito ng isang sikat na banda kaya nagtaka siya kung ano ang ginagawa ng binata sa liblib na lugar at naroon sa mansiyon na pinasok niya upang humingi ng tulong. Nagkamali kasi ang mga kumidnap kay Yomi at sa naturang liblib na lugar siya ibinaba.
Hiniling ni Gray na tulungan niya itong makatakas sa mga bodyguard ng ama. Naka-“house arrest” si Gray dahil ayaw nitong magtrabaho sa kompanya ng ama at mas pinili ang pagbabanda. Naitakas ni Yomi si Gray pero dahil super broke siya, inialok niya ang sariling bahay para upahan nito. Pabor iyon kay Gray dahil hindi talaga ito matutunton ng ama roon.
Pero hindi inasahan ni Yomi na tuluyang mahuhulog ang loob niya kay Gray nang magpanggap silang magkasintahan upang itaboy ang makulit at longtime niyang manliligaw. Si Gray din ang first kiss niya, na kahit pagpapanggap lang ay ramdam niya na may kakaiba sa halik.
Pero pangarap lang yata ang lahat dahil natunton na si Gray ng ama nito. Mula noon ay hindi na nagpakita ang binata sa kanya…