Ipaglaban man kita o hindi, kung talagang mahal mo ako, ako pa rin ang pipiliin mo.

Naging kalakaran na mula noong unang panahon na lalaki ang nanliligaw sa babae. Pero katwiran ni Rowie ay hindi na laging ganoon sa makabagong panahon, na uso nang ang mga babae ang nanliligaw sa mga lalaki. Kaya nang tamaan si Rowie ng pinaghalo-halong crush, infatuation, puppy love, at true love sa hunky vet na si Dr. Butch Lepanto ay nag-a la Gabriela Silang siya. Sumunod siya sa gusto niyang gawin.
Hindi na raw niya kailangan pang mag-apply na girlfriend nito, pabirong sabi sa kanya ni Butch. Tanggap na raw agad siya. At bago pa niya namalayan ay umaakto na itong boyfriend niya.
Minahal niya si Butch nang buong-buo: puso, katawan, at kaluluwa. Siya na yata ang pinakamasayang nilalang sa ibabaw ng mundo. Ngunit short-lived lang ang saya ni Rowie nang malaman niya kung ano ang tunay na pakay ni Doc Butch kaya pumayag itong maging boyfriend niya. Huli na nang matuklasan niyang ang inakala niyang knight-in-shining-armor ay siya palang kontrabida sa istorya.