May sarili kang MUKHA, hindi mo na kailangang gumamit pa ng mukha ng iba. Ang POSER kapag hiningan mo ng FANSIGN, ang sagot laging NEXT TIME.

Libangan lamang para sa isang normal na estudyante na si Jammy Ocampo ang pag-i-Internet. Pero nang gumawa siya ng account gamit ang pagkatao ng best friend na si Angel Gonzales ay naging mas exciting para sa kanya ang online world. Wala siyang masamang intensiyon nang gawin ang account. Ang tanging hangad lamang niya ay maging updated ang mga fans ni Angel. Hindi rin naman lingid sa kaibigan na papasikat pa lamang na artista ang public account na ginawa niya.
Sa pagdaan ng mga buwan gamit ang account na iyon ay hindi naiwasan ni Jammy na makasalamuha ang ibat ibang uri ng tao. Isa na roon si Brix Torres, masugid na tagahanga ni Angel. Regular ito kung mag-message, mas madalas pa kompara sa mga babaeng fans. Hindi niya ito pinapansin dahil wala naman itong ginawa kundi bumati. Hanggang sa isang gabi ay nag-iwan ito ng linya na nagdulot ng kakaibang kilig sa kanyang sistema.
Ngunit paano siya magpapakilala kay Brix? Paano niya ipapaliwanag dito na iba ang pagkatao niya at kaibigan lang siya ni Angel? Kakausapin pa kaya siya nito kapag nalaman ng lalaki kung sino siya? Paano kung hindi magustuhan ni Brix ang dahilan niya at tawagin siyang POSERA?