Hindi ko magagawang magmahal ng iba Dahil ikaw lang ang kilala ng puso ko.
Kumukulo ang dugo ni Ada sa boss niyang si Arthur Franz de Luna. Adelantado at arogante ito. Tila misyon din ng binata sa buhay ang painitin ang ulo niya araw-araw. Kaya lagi rin siyang may sagot sa bawat atake ng kanyang boss. Kung hindi nga lang napakalaki ng utang-na-loob niya sa mga magulang ni Arthur Franz ay matagal na siyang nag-resign sa trabaho.
Pero naglaro ang tadhana. Nagkasakit si Ada at ang binata ang nasa tabi niya. Hindi niya inasahan ang labis na pag-aalala ni Arthur Franz sa kanya. Sa unang pagkakataon, nakapag-usap sila nang hindi nagbabangayan.
Iyon ang naging daan para magbago ang pakikitungo nila sa isat isa. Nadiskubre ni Ada ang magagandang katangian ni Arthur Franz na hindi niya nakikita noon dahil sa inis niya sa binata.
At dahil nagkalapit na sila, hindi niya nagawang magalit nang bigla na lang siya nitong nakawan ng halik. Dahil kung magpapakatotoo siya, aaminin niyang kinikilig siya sa ginawang iyon ng binata.