“Ang true love hindi
dapat limited edition lang. Forever dapat `yon.”

“Kawanggawa Queen” ang bansag kay Maia ng mga kaibigan niya. Dahil sa isang masakit na nakaraan, nagpakalunod siya sa trabaho at tumulong sa mga nangangailangan. Kaya hindi siya nakatanggi nang ipasa sa kanya ng kapatid ang problema nito: ang anak nitong si Alanis na prinsesa ng mga pasaway.
Salamat na lang at may nakilalang bagets ang kanyang pamangkin, si Lucio na VGI, o very good influence, kay Alanis. Ang masaklap, anak pala si Lucio ng lalaking ipinanalangin ni Maia na tubuan ng maraming kulugo—si Craig, ang kanyang first and only love.
Nabuksan uli ang komunikasyon sa pagitan nila ni Craig. Noon natuklasan ni Maia na may isa pang titulong babagay sa kanya—ang Reyna ng mga Tanga. Mukha kasing mai-in love na naman siya kay Craig kahit pa ipinangalandakan ng hinayupak na ayaw nito ng commitment. How stupid can she get ba talaga?