Sikat na kolumnista at feature writer si Karliyah sa isang magazine. Sikat ang column niyang Pretty To Be Broken sa pagbibigay ng advice sa love problems na natatanggap niya online. Marami siyang naibibigay na advice para sa mga may love life. Pero siya mismo, zero ang love life. Sanay siyang kontrolin ang emosyon pagdating sa pakikipagrelasyon. Ayaw kasi niyang masaktan at magaya sa mga letter sender niya na umiyak dahil sa pag-ibig.
Hanggang sa nakilala niya ang sikat na actor-model ng bansa: si Eldran del Castillo, kapatid ng may-ari ng magazine na pinagtatrabahuhan niya. Na-challenge pa yata si Eldran nang mapansing siya lang ang hindi tumitili kapag nakikita ito.
“I can’t fall for you. You’re an actor,” sabi ni Karliyah nang minsang subukan ni Eldran na pormahan siya.
“I will quit showbiz. You can fall for me as you wish,” sabi naman nito.
Distracted tuloy si Karliyah kahit alam niyang nagbibiro lang si Eldran. Pero nang makita niyang seryoso ang mukha nito ay parang gusto na niyang kiligin.
Pero nasaksihan niya kung paano ito makipaglandian sa ibang babae kahit kasama siya. And as usual, parang enjoy na enjoy si Eldran sa atensiyon at halos pagsamba ng mga babae rito. Nali-link din ito sa kung sino-sino. But to her dismay, she was falling more for Eldran!
Kailangan na yata ng bagong columnist ng Pretty To Be Broken, dahil ngayon ay siya naman ang magiging letter sender.