Nasaktan lang ang puso mo, hindi ka nawalan ng puso.

Unang kita pa lang ni Gino sa inglisera at sosyalerang babaeng bigla na lang sumulpot sa lugar nila ay mainit na agad ang dugo niya sa babae.
Mukhang nakita na niya ang babaeng ito Tama! Ito si Mikaella Madrigal, anak ni Senator Alberto Madrigal na madalas na laman ng mga balita dahil sa pagiging sutil na anak ng mabuting senador. Ano ang ginagawa ng babaeng ito sa lugar na tinitirhan niya?
Hindi makakapayag si Gino na dalhin ni Mikaella sa teritoryo niya ang pag-uugali nito. Hindi nababagay sa teritoryo niya ang magbuhay at mag-asal-prinsesa. Kailangang ang dalaga ang mag-adjust, hindi siya. Pero habang tinuturuan niya si Mikaella na makibagay at makihalubilo sa kanilang mahihirap ay hindi niya namamalayan na dahan-dahan na rin pala nilang tinuturuan ang sarili na muling magmahal. Lalot napatunayan niyang maganda ang ugali nito.
Alam ni Gino na hindi tama ang nararamdaman niya para kay Mikaella dahil magkaiba ang mundo nila at pagkatapos ng tatlong buwan ay iiwan na sila ng dalaga. Pero ano ang magagawa niya? Mahal na niya talaga si Mikaella.