Minsan, kahit hindi natin gusto, ang pinakanasasaktan nating tao ay ang pinakamahalaga rin sa `tin. Dahil hindi sila masasaktan kung hindi sila mahalaga o kung bale-wala lang tayo sa kanila.

Nang makita ni Paula si Cedric sa Addis Springs Resort kung saan siya nagtatrabaho, naging malakas ang kutob ni Paula na hindi iyon ang unang pagkakataong nagkrus ang mga landas nila ng binata. Masyado kasing pamilyar ang hitsura at kilos ni Cedric. Lalo na nang bigla siyang nahilo at sinalo ng pamilyar ding mga bisig nito. Pero itinanggi ng binata na nagkakilala na sila noon.
Hindi nagtagal ay nagpakita naman ng interes si Cedric sa kanya. Hindi na rin napigilan ni Paula ang mabilis na pagkahulog ng loob sa binata na laging nasa paligid lang kung may nangyayaring hindi maganda sa kanya. Idagdag pang lagi rin siyang nananabik sa tamis na dulot ng nakakaadik na halik nito.
Pero nagkakataon nga lang ba ang lahat? Paano kung tama ang kutob ni Paula na si Cedric nga ang taong may malaking kaugnayan sa kanyang nakaraan at kung ano ang kanyang kalagayan ngayon? Ano ang mabigat na dahilan ni Cedric upang itago sa kanya ang katotohanan?