Sinabi ko sa sarili kong paiibigin kita hindi para pagselosin ang sino man, o paiibigin at pagkatapos ay iiwan at sasaktan. Kundi paiibigin kita dahil gusto kita at dahil gusto kong maging akin ka.

Ni sa hinagap ay hindi naisip ni Eya na mahuhulog ang kanyang loob kay Zander. Napakayabang at playboy kasi ng binata. At ang masama pa, siya ang palagi nitong nakikita at pinagti-trip-an. Pero hayun na nga, nang sa wakas ay tigilan siya ni Zander, sa hindi malamang dahilan ay na-miss niya ang presensiya at pang-iinis nito.
Dahil doon, lihim niyang sinundan-sundan si Zander. At may natuklasan siya: ang inaakala ng lahat na mayamang si Zander Montemayor ay isa lamang palang anak ng mag-asawang magsasaka!
Iyon ang ginamit ni Eya upang mag-take advantage sa sitwasyon. Kinausap niya si Zander at nakipagkasundo upang magpanggap na boyfriend niya kapalit ng hindi pagsisiwalat ng sekreto nito, na siyempre, ang hidden agenda ay ang unti-unti itong paibigin.
Pero mukhang walang magandang ending ang sinimulan ni Eya. Dahil natuklasan niyang ang inaakala niyang kontroladong sitwasyon ay kasama pala sa palabas ni Zander upang muli ay pag-trip-an siya. Ngayon, hindi lang humiliation ang dapat niyang harapin, kundi maging ang paglimot sa nabigong pag-ibig.