“Kapag nagsumpaan tayo, alam kong mahal mo ako. Alam mo rin na mahal kita. Dapat ay ganoon ang kasal—ang pagdiriwang ng pagmamahalan natin sa isa’t isa.”    Para kay Laurel Kintanar, ang pagsasaya sa Las Vegas kasama ang isang guwapong lalaki ay isang bagong karanasan.  Bilang isang matinong babae, walang ginawa si Laurel sa buong buhay niya kundi kumilos sa paraang alam niyang maganda at mabuti para sa mga mata ng ibang tao—kahit pa sa bandang huli ay problema at pagkaligalig lang ang idinudulot sa kanya.  Ang magpakasawa sa pamamasyal kasama ang kaakit-akit na si Rakin Abellana ay isang masarap na pag-iilusyon. Napakasarap kaya humantong si Laurel sa pagpayag sa isang marriage of convenience para makuha ni Rakin ang mamanahin nito. Ngunit ang pagiging mag-asawa lang sa papel ay mas nakatutukso kaysa sa kanilang inaasahan.  At agad-agad naramdaman ni Laurel na ang mga patakaran sa kanilang pansamantalang pagsasama bilang mag-asawa’y nagdudulot na ng  pagpapahirap sa kanya…