Wala sa plano ni Esmeralda ang umibig. Pero kinailangan niyang pumasok sa isang marriage of convenience nang maubos ang kabuhayan nila sa pagpapagamot sa kapatid na may leukemia. Kailangan naman siyang pakasalan ni Aiden para makuha ng lalaki ang mana mula sa lola nito at para makakawala sa aroganteng kapatid.
Pero nagbago ang lahat nang sagipin ni Esmeralda ang guwapo at matipunong lalaki na tinangay ng agos ng ilog sa gitna ng malakas na bagyo—si Richard Infante. Mayaman ito at arogante, mga katangiang ayaw niya sa isang lalaki. Pero tuwing tititigan siya nito ay para siyang natutunaw. Sinindihan ni Richard ang apoy sa puso at pagkatao niya. Ipinadama nito sa kanya kung paano ang magmahal kahit sa maikling panahon ng pagsasama nila. Kaya handa siyang talikuran ang lahat para maghintay sa pangako nito na babalikan siya.
Pero sino ang mag-aakala na ang pag-ibig niya ang siyang susunog sa lahat ng plano at pangarap niya, lalo na kung ang lalaking mahal niya ay isa palang kaaway?