“Kahit kailan, hindi ko pinangarap na magustuhan ka. Pero… Dinaan mo ako sa pagbibilad mo ng katawan! Tao lang ako, naaakit din…”

Galit na galit si Vina dahil nahuli niya ang boyfriend niya na nagtataksil! At para maglabas ng sama ng loob, umakyat siya sa rooftop ng condominium na tinitirhan at doon siya nagsisisigaw. Bad trip siya sa kanyang ex, pero mas bad trip siya kay Kupido. Romantic siyang tao kaya hindi niya matanggap na palagi na lang nauuwi sa pagiging heartbroken.
Nasa kainitan si Vina ng pagwawala nang may biglang nang-istorbo: isang lalaking mas maganda pa yata kaysa sa kanya. At pinapaalis siya! Papatulan na sana niya ang lalaki, pero bigla na lang itong nadulas at pumlakda sa sahig. Masaya na sana siya sa sinapit ng antipatiko at pakialamerong lalaki kung hindi lang niya na-realize na sa kanya galing ang bote ng mineral water na natapakan nito!
Guilty, she went to him to offer help, kahit pa pinapaulanan na siya nito ng bad words.
Hanggang sa nakilala na ni Vina ang lalaki—si Noah De Mesa, ang drummer ng Luna’s Cape’s! Ang lalaking tinalo pa siya sa kaputian at sa haba ng mga pilikmata. Ang lalaking tinitilian ng kababaihan mula pa noong nasa college sila. Ang lalaking tinik sa kanyang lalamunan.
Asar talaga `tong si Kupido. Ka-love team ang hanap niya, hindi ka-wrestling!