“Bigyan mo ako ng karapatang magselos at ipapakita ko sa iyo kung paano ako magselos.”

Sanay na si Erica Mae na nandiyan lang palagi sa tabi niya si Rory, ang lalaking naging father figure na sa kanyang anak na si Onyok. Kung hindi dahil kay Rory, baka hindi na niya nailabas pa sa mundo si Onyok. At baka hindi rin niya kinaya ang pagiging single mom.
Kaya nanibago siya nang biglang magsungit si Rory pagkatapos nitong makilala ang suitor niyang half Pinoy-half Korean.
“Hindi naman siguro dahil sa PMS kaya ka masungit. Kaya kung hindi topak ang tawag diyan sa mood mo, ano?”
“Alam mo, Em, may topak akong matagal na matagal ko nang tinitimpi.”
“Aba, pakawalan mo `yan at baka sumabog na.”
Kinabig siya ni Rory palapit dito. “`Eto na nga, gagawin na.” His lips descended on hers.
Dahil sa halik na iyon, biglang nakita ni Erica Mae si Rory bilang isang lalaki na kokompleto sa kanyang pagkababae. Bigla-bigla, ayaw na niyang maging single mom.