“Alam kong tanga ako dahil ngayon ko lang na-realize na mahal pala kita. Pero mas magiging tanga ako kung pakakawalan pa kita.”

Dalawampu’t apat na taong gulang na si Fiona pero hanggang ngayon ay NBSB pa rin ang relationship status niya. She was pretty, smart, and kind-hearted. Ngunit sa kabila ng magagandang katangian niya ay nananatili pa rin siyang single. Bakit? Dahil isang lalaki lang kasi ang pinangarap niyang makasama sa habang-buhay. Iyon ay walang iba kundi ang best friend niyang si Ethan Zamora.
Ang problema, nakababatang kapatid lang ang turing sa kanya ni Ethan. At habang dumaraan ang mga taon ay tila lalong lumalabo ang pag-asa niyang maging si Mrs. Zamora.
Nang sumulpot uli sa buhay nila ang dating nililigawan ni Ethan na si Heart—ang babaeng nais daw nitong iharap sa altar ng simbahan—ay tuluyan na siyang pinanghinaan ng loob. Pananagutan daw nito ang sanggol sa sinapupunan ni Heart kahit hindi ito ang ama. Kapag nangyari iyon, tatandang dalaga na talaga siya.