Malapit nang mamatay si Don Ricardo, ang may-ari ng pinakamalaking flower farm sa Tagaytay at kumupkop kay Avery mula nang maulila siya sa mga magulang. Ang tanging hiling nito ay makita ang anak nitong lalaki na matagal nang nawalay rito.
Kahit may phobia siya sa pagbibiyahe nang malayo, nagtungo siya sa Maynila upang hanapin ang anak nito. Habang nasa daan, may isang motorsiklong nag-cut sa pickup nila. Tumilapon ang sakay niyon. Ipinagpasalamat niyang ligtas ang driver niyon na walang iba kundi si Marco, ang anak ng don.
Hindi naman siya nahirapang dalhin ito pabalik sa Tagaytay at ipakilala ito sa ama nito.
Siya ang inutusan ng don na magturo sa tagapagmana nito ng pamamalakad sa flower farm. Hindi iyon naging madali sa kanya dahil bukod sa mayabang at antipatiko ang guwapong lalaki, pinoproblema rin niya ang damdaming unti-unting binubuhay nito sa puso niya para dito...