“Mas gusto ko kung magtutulungan tayo na abutin ang mga pangarap natin. Maging inspirasyon tayo ng isa’t isa.”

Kailangan ni Jemaikha na makahanap ng raket para masustentuhan ang pag-aaral. May sakit ang kanyang ama at may nag-aaral pa siyang kapatid.
Parang natagpuan niya ang Yamashita treasure sa katauhan ni Hiro Hinata, isang guwapong exchange student sa university na pinapasukan niya. Pagkatapos na muntikang madukutan ang lalaki ng mga batang palaboy at magkaligaw-ligaw dahil hindi marunong mag-English at mag-Filipino, nagprisinta siya na maging tutor nito with matching luto, laba, plantsa pati sing and dance.
Pero imbes na maging aliping sagigilid ni Hiro, para siyang prinsesa kung tratuhin nito. At kahit anong pilit ni Jemaikha na kontrolin ang pagkatunaw ng puso tuwing nakangiti at nakatitig ito sa kanya, wala siyang kalaban-laban sa karisma ng lalaki.
Pero isang araw, biglang nagpatulong si Hiro na ligawan ang babaeng gusto nito.
Aray ko, bhe.