“Hindi ako papayag na hindi tayo magkatuluyan. Ikaw lang ang gusto kong pag-alayan ng pangalan ko at wala nang iba.”

Kinaiinisan ng marami si Marjorie Alastair dahil effective siyang kontrabida. Ikinatutuwa niya iyon. Ibig sabihin, magaling siyang artista. Wala siyang pakialam kahit hanggang sa totoong buhay ay maraming inis sa kanya. Proud pa niyang isinasabuhay ang pagiging mataray at maldita.
And then she met Lucas, ang lalaking parang immune sa pagtataray at pagmamaldita niya. Hindi rin niya maintindihan kung bakit mabait ito sa kanya. He genuinely liked her.
Namalayan na lang ni Marjorie na nahuhulog na ang loob niya kay Lucas. Wala siyang kasinsaya nang ligawan nito at i-announce sa lahat ang pagmamahal sa kanya. Siya raw ang bida sa buhay nito.
Pero umeeksena si Loreen, ang bida sa mga palabas na lagi niyang inaapi. At kakampi nito ang ina ni Lucas na isinusuka naman siya.
Sila naman ni Lucas ang nagmamahalan, bakit pakiramdam niya ay siya pa rin ang kontrabida?