Nakasanayan na ni Katrina ang mamuhay mag-isa mula nang mag-asawa ang mommy niya at magkahiwalay sila. Nakatutok siya sa negosyo dahil doon siya magaling. Doon kasi siya hinubog ng mommy niya—sa matalinong paghawak sa responsibilidad na ipinagkatiwala nito sa kanya.
Ngunit mayroon siyang isang problema—sa pagtatapos ng bawat araw na umuuwi siya sa bahay na walang naghihintay sa kanya ay sinasakop siya ng emptiness at lungkot. Napagtanto niyang napapagod na siyang mag-isa. At sa estadong iyon ng emosyon niya dumating sa kanyang buhay ang pulis na si Robbin ‘Brave’ Guanson. Sa isang iglap ay nagkaroon ng bagong kahulugan ang buhay niya. Ipinaramdam nito sa kanya kung paano maging masaya, kung paano ang magkaroon ng karamay, at kung paano ang mahalin at magmahal. Ngunit sa huli, ipinaramdam din nito sa kanya kung paano masaktan…