Sa banda na Heart’s Limit, si Paquito “Paige” Madrigal ang paborito ni Kim—paboritong hatakin para magpalibre sa sine at kumain sa paborito niyang fast-food restaurant. Ito rin ang paboritong kakulitan, kaasaran, at iyakan niya kapag nabasted siya ng mga crushes niya. Ito lang kasi ang kaibigan ng kuya niya sa banda na sigurado siyang hindi niya gugustuhin kaya panatag na panatag siyang abusuhin ang kabaitan nito. Higit sa lahat, Paige was always there for her.
Kaya naman nang makita niyang pinagtataksilan ito ng girlfriend nito ay bumuo kaagad siya ng plano para hindi ito masaktan. Pero ang lokong si Paquito ay iba naman ang trip—kumanta ito ng “Walang Kapalit” na may kasama pang crocodile tears habang nakatingin sa direksiyon niya. Ngunit nang sundan niya ito sa backstage ay mariing halik lamang sa mga labi niya ang paliwanag nito.
And the next hours, he was gone…