God knows how lucky I am to have you. Magmamaganda pa ba ako, eh, ayoko rin namang mawala ka sa akin?
Kinukulit na si Frances ng pamilya at mga kaibigan niya na magka-boyfriend. Pero masyado pa siyang bata at hindi naman siya nagmamadaling sumuong sa isang relasyon.
Hanggang sa makilala niya si Ethan, ang guwapo at sikat na TV director na dati pala niyang kaklase sa kolehiyo. Sa unang pagkakataon ay tumibok ang kanyang puso. Naniniwala siyang ito na ang lalaking hinihintay niya kaya kahit kakikilala pa lang nila ay naging sila na; wala siyang pakialam kahit sobrang bilis ng pangyayari. Mahal niya si Ethan at ayaw niyang mawala ito sa kanya.
Kahit iyon na ang pagkakataong hinihintay ng mga mahal sa buhay ni Frances, ang magka-boyfriend siya, hindi naman nagkulang sa paalala ang mga ito. Kahihiwalay lang kasi ni Ethan sa girlfriend nito. Nag-aalala ang mga ito na baka rebound lang ang lahat.
Ayaw niyang paniwalaan ang sapantaha ng mga ito, pero paano niya ipaliliwanag na hindi pa niya naririnig mula kay Ethan na mahal siya nito?