“Mas gusto ko na pag-isipan ka ng masama. Dahil ayokong matibag ang pader na ibinalot ko sa puso ko at hayaan kang saktan na naman ako.”

Si Jeyrick lang ang lalaking minahal ni Paloma. Minsan na itong nawala sa buhay niya nang pumasok siya sa showbiz. Makalipas ang anim na taon, isa na siyang fading star sa showbiz at ang lalaki naman ay naging viral internet sensation pagkatapos makuhanan ng picture na nagbubuhat ng carrots sa Mountain Province. Pero naglaho si Jeyrick at ginagalugad ng reporters at fans ang buong Cordillera sa paghahanap dito.
Para muling pag-usapan sa showbiz, kailangang makita ni Paloma si Jeyrick para madala sa Maynila. May ideya siya kung saan ito nagtatago. Handa siyang tawirin ang mga bundok at landslides para lang makasama ang lalaki.
Pero nang makita niya si Jeyrick, parang ayaw na niya itong i-expose sa showbiz. Gusto niyang sa kanya lang si Jeyrick. Parang gusto na lang niya ng tahimik na buhay sa Kadaclan, malayo sa ingay at gulo ng showbiz.
Pero walang lihim na hindi nabubunyag. Nang malaman ni Jeyrick ang totoong pakay niya sa paghahanap dito, isang kasinungalingan na lang para sa lalaki ang pag-ibig niya. May pag-asa pa ba si Paloma na mapaniwala ang puso ni Jeyrick sa pagmamahal niya?