“Kung may gusto man akong humalik sa akin, ikaw `yon.”

Paniwalang-paniwala si Hazel sa konsepto ng tunay na pag-ibig, lalo pa at masaya siya sa dalawang taong relasyon kay Gabby. Akala niya ay aalukin na siya nito ng kasal. Bumili kasi ito ng engagement ring. Iyon pala, hindi iyon para sa kanya!
At parang nang-iinis ang tadhana, sa lahat ng taong puwedeng makakita sa kamiserablehan niya nang araw na iyon, ang ex-boyfriend pa niyang si Ken! Ang sabi ng magaling na lalaki, responsibilidad daw nitong samahan siya sa pighati dahil may pinagsamahan naman daw sila.
Pero sa kabila ng mga pagtataray niya kay Ken, hindi ito umalis sa tabi niya.
At kahit tila panata na yata nito ang pambubuwisit sa kanya, aminado naman siyang napapawi ni Ken ang kalungkutan niya hanggang sa matagpuan na naman niya ang sariling nahuhulog sa binata.
Nilunok ni Hazel ang pride at ang sumpa na hindi na muling mamahalin si Ken. Pero ang masakit ay ang malamang bumalik lang talaga ito sa buhay niya para matulungan siya sa kanyang pinagdaraanan at wala nang iba pa. Kung bakit kasi tatanga-tanga siya at umasa pa!