Marami akong plano sa buhay pero parang mawawalan ng saysay ang kahit pa ang pinakamagandang pangarap ko kung wala ka sa buhay ko

Bago mamatay ang matandang pinaglilingkuran ni Mauve ay may ibinilin ito sa kanya. Hanapin daw niya ang isang antigong mapa na puwedeng ibenta sa malaking halaga. Hindi lang ang pera ang habol niya kundi ang matupad din ang huling habilin ng isang taong naging napakabuti sa kanya.
Dahil doon ay napadpad siya sa pamamahay ni Brynn, isang dating sikat na basketball player pero dahil sa injury ay napilitang magretiro. Naging idol pa niya ito dati pero agad na nawala ang amor niya rito nang matuklasang masungit pa ito sa nanganak na leon. Gayunman, napilitan siyang mag-apply na kawaksi sa lalaki para magkaroon siya ng pagkakataong hanapin ang mapa.
Pero sa halip na ang mapa ang mahanap niya ay natagpuan niya na sa paglipas ng mga araw ay nanunumbalik ang dating fascination niya sa lalaki. Hindi lang iyon, napapamahal na ito sa kanya. Ngunit para namang ginagawa siyang joke time ng tadhana. Dahil nang mahanap niya ang mapa ay si Brynn naman ang nawala sa kanya.