"Ngayon alam kong mahal mo ako dahil narito ka sa lugar kung saan kita unang hinalikan at hindi ka tumanggi. At huwag na huwag mo akong tatanggihan if I ask you to marry me.
"Taxi!" Tumatakbong lumapit si Alvaro sa sasakyan.
Napalunok si Ceejay nang makita sa rearview mirror niya ang guwapong mukha ng kanyang pasahero.
"Pare, Intercon tayo. please."
Parang may bumara sa lalamunan ng dalaga, kasabay ng malakas na pagdagundong ng kanyang dibdib nang marinig ang baritono at lalaking-lalaking tinig nito.
Sino ba'ng hindi matutuliro sa lalaking sakay? Tila prinsipe itong matikas ang pagkakaupo. Almond-brown ang mga mata, perpekto ang hugis ng ilong, at mapupula ang mga labi.
Mistulang hulog ng langit ang kakisigang iyon!
Pare? Napagkamalan na naman siyang lalaki.
Tila ibig maghimagsik ng kanyang kalooban.
Gusto niyang malaman ng guwapo niyang pasahero na certified babaing-babae siya!