Naniniwala si Andrea na isinumpa siya ni Lemuel, ang kaibigan niyang nagpakamatay dahil binasted niya. Ayon sa suicide note na iniwan nito, isinusumpa nitong hindi siya magiging masaya.
Ayaw sanang maniwala ni Andrea sa sumpa, pero nang lokohin siya ng lahat ng naging boyfriend at layuan ng mga manliligaw, naisip niyang totoo ang sumpa. Bahala na si Batman kung may lalaking darating na magmamahal sa kanya.
Then Leon came into the picture. Gusto raw nitong makipaglapit sa kanya. Ayaw sanang pumayag ni Andrea, lalo pa at attracted siya kay Leon—isa itong heartbreak waiting to happen—pero namalayan na lang niyang napasok na nito ang kanyang buhay, at walang ka-effort-effort na nasungkit ang kanyang puso.
Pero sa pagkakataong iyon, hindi ang sarili ang inaalala ni Andrea. Natatakot siyang maapektuhan ng sumpa si Leon kaya urong-sulong siya. Kaya lang, hindi naman yata ang sumpa ang maglalayo sa kanya kay Leon. Ito mismo ang gagawa ng paraan. Dahil hindi pala siya ang pakay ni Leon sa paglapit-lapit sa kanya kundi ang kanyang best friend…
Ah, mukhang talagang mabagsik ang sumpa ni Lemuel. At ngayon lang siya nasaktan nang husto.