“Paano ka na lang kung mag-aasawa na ako ngayon? Eh, di wala nang magpapakasal sa `yo…”

Bata pa si Carrie at teenager si Dave ay para na silang aso’t pusa. Hindi iyon nagbago hanggang sa maging professionals na sila. At dahil partner ng tito niya si Dave bilang bodyguard ng mayor ng bayan nila at siya ay sa bahay ng tiyuhin nakatira at best friend ang anak ng mayor, hindi maiwasang laging nagku-krus ang mga landas nila ni Dave.
At napadalas ang pagkikita nila nang malagay sa alanganin ang buhay ni Carrie dahil sa pagkakabunyag na anak siya ng isang senador. Si Dave ang kinuha ng kanyang ama na maging bodyguard niya. At nang magsunod-sunod ang death threats, kinailangan muna niyang magtago at si Dave ang in-assign na makasama niya.
Hindi namamalayan ni Carrie na nahuhulog na pala ang loob niya kay Dave, lalo na nang makilala ito nang husto habang nagsasama sila sa iisang bubong. Ang masaklap, walang katugon ang damdamin niya. Para kay Dave, isa lang siyang trabaho. Tama nga siguro ang mga pang-aasar nito noon na tatanda siyang dalaga…