Para kay Pie, si Daniel Elizalde na yata ang pinakamabait, pinakamaunawain at pinakaguwapong lalaki na kanyang nakilala. Hindi kasi ito nangiming samahan siya at pakinggan ang lahat ng sama ng loob niya. Pero nang bigla na lang siyang sungitan nito at ibaling sa kanya ang init ng ulo ay nagbago ang tingin niya sa lalaki.
Hindi inaasahan ni Pie na muli niyang makikita si Daniel sa isang date. Siya kasi ang pumalit sa kaibigan niya para sa blind date nito. Humingi ng paumanhin si Daniel na tinanggap naman niya.

Mula nang magkaayos sila ay unti-unti rin silang nagkakalapit. Sa loob ng ilang araw na pagkakakilala ay agad na niyang nakagaanan ng loob si Daniel. Lalo pa niyang nakikilala ang tunay na pagkatao nito. Napansin din niya na unti-unti nang nag-iiba ang nararamdaman niya para kay Daniel. With someone so kind, caring and sinfully gorgeous, what’s not to like?

Pero hindi pa man nagtatagal ang espesyal na nararamdaman ni Pie kay Daniel ay nasira na iyon. Hindi niya sukat-akalain na ang binata pala ang dudurog sa kanyang puso at sisira sa prinsipyong matagal na niyang pinaniniwalaan.